ders

Ders, m. Que aucuns escrivent et prononcent Day, mais abusivement, est proprement le tapis dossier, d'estoffe riche et legere, lequel pendant en surciel quarré sur l'endroit de la table du Roy, ou autre Prince souverain, où ils s'asséent pour prendre leur repas, vient devallant bien bas par derriere leur chaire. Il en est par eux usé autre part, comme, au lieu qu'ils donnent audience. Et est ce ders signe de Majesté et grandeur souveraine. Il semble venir de ce mot Latin, Dorsum, Et selon cela on le pourroit rendre par Aulaeum dorsuarium, et dossuarium. Ou bien simplement par Aulaeum, parce que Varron dit, que les Aulées estoient anciennement souspendus, en maniere de surciel, (ou Ciel, qu'on dit communéement) par ce que les planchers en voute n'estoient encores lors en usage. Et estoient souspendus (dit-il) pour arrester la poulsiere qui cheoit d'enhaut. Et Horace au liv. 2. des sermons, Satyre huitiesme, l'endite aucunement, qui peut bien avoir esté une partie de la cause pourquoy les Roys et Princes souverains ont commencé d'en user, ainsi que de la serviete, et du couvert de leurs plats et hanaps: Mais ce a esté aussi en grande partie par Majesté et grandeur. Conopeum mensarium.

Thresor de la langue françoyse. Jean Nicot.